الحقائق التي يخفيها لاجئي أوربا خوفاً من الشماته بهم

nethrland-660x330رانيا سماقية – سوريات

هذا ما لايقوله السوريين في المهجر: يكذبون خوفاً من الشماته !!!!!

حدهم صور بيتاً في ألمانيا و قال لزوجته أنهم أعطوه هذا البيت … خوفاً من الشماته و من أن يجعلها تقلق لأنه يسكن ببالون بملعب ببرلين!!!!!!

من يعتقد أننا نعيش بالكامبات في الجنة الموعودة …. هذه غرفتي و المخصصة لشخصين … السكن فيه أربع غرف كل غرفة مخصصة لشخصين من جنسيات و قوميات و أعراق مختلفة … تواليت و حمام لثمانية أشخاص و مطبخ صغير جدا ً نتناوب للطبخ فيه و نختصم من أجل رف … و لكم أن تتخيلوا عناء الدخول التواليت صباحاً و كميات التعقيم الواجب عملها …

في هولندا نسلم أنفسنا بمكان يدعى تير أبيل و كانت ثلاثة أيام غاية في الصعوبة ثم ينقلولنا إلى كامب انتظار ثم كامب تحقيق ثم بعد أخذ الإقامة التي من المفروض أن تأخذها ب 60 يوم و كل مرة بكل كامب ناس جدد و جنسيات مختلفة و يمكن قبل الكامب الدائم أن تحوي كل غرفة على ثلاث ، أربع ، ستة أسرة و تكون الحمامات و التواليات عامة لكل طابق و لكم أن تتخيلوا …..

لما بنوصل ما معنا ملابس … بتاخدوا موعد و بتوقفوا بالطابور مشان تدخلوا على غرفة فيها ملابس مستعملة و لو تشوفوا اللاجئين … أذكر أنني ذهبت لأنني مضطرة لجاكيت … بكيت لثلاثة أيام قهراااااااااااااً …….. و بعد ذلك وزعته … لأني تمكنت من شراء غيره … بالغربة عليك أن تعتاد على التسوق من السكاند هاند .!!!!!!!!!!

في مرحلة ما قبل الكامب الدائم الأكل تقدمه الحكومة الهولندية و كذلك مواد التنظيف لانو ما بيدفعوا مصاري لناخد الإقامة و بهالكامبات : طابور للأكل ….. طابور لمواد التنظيف … طابور لكل شيء و مناظر من اللاجئين بتخزي و خناقات ع الأكل … و شطارة لجمع الملح و قنص أكبر كمية من مواد التنظيف لمرحلة الكامب الدائم !!!!

تعتادون فكرة أخذ نقود من الحكومة بدون عمل و تنزف كرامتكم لكن لا حل …. قهر الدنيا لكن لا حل … بعض الناس يعتبرونها شطارة أنهم لا يعملون و يأخذون نقود !!!!!

قبل الإقامة لا نأخذ نقود و بعد الإقامة في الكامب الدائم نأخذ كل أسبوع 57 يورو …. و مع مواصلات غالية جدااا نعيش بكرامة بالكامب لكن ع القد تماماً .

نمضي بالكامب الدائم أشهر … بعضهم هنا منذ سنة و شهرين و مازالوا ….

بعد أن يعطون بيتاً يعطون العازب 900 يورو و المتزوجين الأب و الأم معاّ 1300 يورو و الاولاد تحت سن ال21 يعطونهم 250 و فوق ال 21 يعطونهم 600 …. و من هذه المبالغ يذهب الآجار و الكهربا و الماء و المواصلات و الضرائب و غيرها … و لكم أن تحسبوا أن ما يفيض لكم يجعلكم تعيشون بشكل جيد بس كمان ع القد … في أوروبا نحن لا نكنس النقود من الطرقات …. هذا غير موضوع كلمة لاجئ و ثقلها …

هولندا ، ألمانيا ، أوروبا لا تنتظر حضراتنا لتعطينا منازل و ترحب بنا أهل هذه البلدان يعانون من موضوع التأمين الصحي و قلة المنازل و يتذمرون أنهم يدفعون لنا من ضرائبهم …. ألمانيا ليست أفضل من هولندا أبدا ً و حتى من ناحية لم الشمل نفس الشئ … لم الشمل للزوجة و الأولاد و لا يوجد لم شمل للأهل أو الإخوة .

يقولون أن ألمانيا تعطي إقامة دايمة بعد ثلاثة سنوات يقولوووووووووووووووون ….

و من ناحية النقود كل دولة حاسبتها و الكل نفس الشي …

أهل هولندا الكل بيعرف إنجليزي و بيجاوبوكم إذا سألتوا و الناس بالعموم ودودين ….

ماااااااا في دراسة و لا شغل لناخد لغة ، اللغة بدها سنتين أو ثلاثة لنختمها … و بتبدوا دراسة اللغة لتروحوا ع بيوتكم بعد سنة أو أشهر كله حظ و بعد مستوى معين فيكم تدرسوا أو تشتغلوا و بذلك بيبطلوا يعطوكم مصاري …

لذلك لاعاد حدا يسألني اشتغلت و لا حدااا يسألني سجلتي بجامعة !!!!!

الأولاد قبل ال28 بيتكفلوا بدراستهم و بعد ال28 بدكم تاخدوا قروض و ما بيتعرّفوا عليكم ….

هون مافي أخوي و عمي و أهلي … هون مااافي….

و إن شاء الله أكون جاوبت ع أسئلتكم و فهمتوا الوضع … و إلي بيحكي غير الحكي إلى حكيته هو كذااااب قطعاً أنا كنت صادقة معكم …

في ناس بتنبهر بكلشي هون المهم لهالشي ماله ببلدها !!!…. و هدول يضلوا هون أحسن إلهم وللبلد ….

و الي رح يقلي ليش لكن طلعتي بقلهم أنا بنت حلب أربع سنين دمار و تدمير و سرقة كل المال و أوضاع أهلي و حادث أختي وثم وفاة والدي استنفذتني …

و بعرف بعد كل هالحكي أنو مارح تصدقوا و مارح يأثر و رح تضلوا تروحوا ع المهجر ركضضض و حقكم هي حرب و هدا نتيجة طبيعية للحروب و بعرف شو ما حكيت رح تقولوا ألمانيا أفضل من هولندا … .. و العّلة الكل ما بيعترف و ما حدا رح يقول شو عم بيعدي فيه من قهر و ذل بس صور البيوت الحلوة و البرستيج الزائف …

و إلي عم يقلك لا تجي مو لانو داهية و هو مكيف و مبسوط و عم بيلم المصاري باالأراضي و مابده ياك تتنعم معه بس الي عم يشرحلك الوضع الحقيقي و عم بيقلك أنت حر أنت الوحيد الي بتقرر إذا وضعك بيستاهل تحط حالك بقوارب الموت و تصير لاجئ أو لأ هو شخص صادق معك …….و لكل منا قدرة احتمال ….. حاج بقى… و إلي ما بده يصدق يسطفل … و لكل مننا ظروفه و ممكن يكون المهجر للكثيرين أفضل من حلب ألف مرة و ها أنا أكتب لأقول لكم هذا ما ينتظركم بعد دفع مبالغ طائلة و الأولاد تحت ال28 هم المستفيدون مع التأكيد أن المدارس منها مسيحية و منها علمانية و منها دينية إسلامية ما بعرف شو و مين مستلمها و أخلاق الولاد بخطر لأنو ببلشو بغسل الدماغ للطفل بس يوصل فورا ً … و الجامعة و المدارس ببلاش و هي ميزة منيحة … إذا مو فارقة الأخلاق و للي واثق من تربيته الولاد !!!!

و بهالكلام بقصد رح يصير فجوة ثقافية و لغوية و حضارية كبيرة بين الأهل و الأولاد و ثم عزل تام لهذه العناصر في الجيل الذي يليه !!!!! لديهم أخلاقيات مثل النظافة و اللطف و الاحترام و الابتسامة و المؤسسات العلمية التي تحترم و أقول لكم أولادكم تحت أب28 لا اتكلوا هم أبدا هم حريصون جدا على دراستهم و يفتحون لهم أبواب مدارسهم و جامعاتهم مجانا تقريباً و هذا جيد جداً بل ممتاز .. و لديهم الفساد و العنصرية و الأجندات التي تنفذها الدولة حفاظاً على مصالحها و غالباً هذه المصالح تتعارض من الشرق الأوسط… ليس لديهم علاقات اجتماعية عائلية …. لديهم عدم اكتراث بسياسة دولتهم و لذلك 70% منهم لا يذهبون للانتخابات بين الملك و الحكومة خلافات على أنظمة الحكم … لديهم مشكلة في التأمين الصحي و الضرائب على كل شيء بيخطر لكم و أزمة سكن .. و هذا معلومات حصلت عليها من الهولنديين أنفسهن .. لكن شكراً لهولندا من القلب لأنها استقبلتنا بغض النظر عن السياسات و فعلاً من قلبي أشكرهم كلما سنحت الفرصة و خاصة أنو قسماً بالله منيح متحملينا لانو بسوريا ما شفت هيك كمية ناس لا يعرفون المدنية و الله شيء بيخجل و بيفوق الخيااااااااااااال …… شكرا هولندا ….. في حين دول إقليمية و تدعيّ الإسلام خربت بلدنا و ما استقبلتنا و الدنيا بتدووور.

هالمنشور ليس لمهاجمة أوروبا أبدااا ً هو فقط لسرد الواقع و تحليل شخصي و آراء هولنديين في بلادهم و بأوروبا !!!!

بس يا ريت كون جاوبت ع الأسئلة اليومية بالعشرات الي بتجيني باليوم منذ أن وصلت و كأني خبير هجرة !!!!!!!!! و أهلا و سهلا فيكم بس أنا متلي متلكم .

وإلي ما بده يصدقني ع راحته … أنا حكيت ضميري و في ناس مع كل الحكي مجبورين يطلعوا … و ما بلومهم أبداً…و الي بيحب يعمل شير يتفضل….

من يذهب للمهجر عليه أن يتحمل مسؤولية قراره … هنا ليست الجنة إنها تجربة جديدة نحاول عيشها بكل تفاصيلها ….. و نستفيد منها و قد نستمتع إذا استطعنا إحضار أهلنا ليكونوا معنا هُنا … نحن ضحايا حرب و لسنا هنا لنصّيف !

قد يعجبك ايضا